Nesta ocasión, el xefe la tribu decide que Sidronucu yá ye mayor abondo pa presentase con llanza y pintures de guerra pa facer la gran ceremonia d'iniciación, que consiste en tres pruebes de valor: prender un fueu, facer una foguera na piedra sagrada nel picu El Sueve y volver a la Cueva'l Sidrón con un asturcón xabaz. ¿Podrá el nuesu protagonista superar les tres pruebes?

Lo que más-y presta a Marta ye dir a ver al güelu, que-y cuenta histories de cuando salía a la mar, especialmente la vez que vio al Peludín de Carrandi.

La historia tien llugar na aldea de los Astures, un grupu de cabañes defendíes por unes muries nun altu que dominaba la viesca. Una mañana, mentes toos duermen, los sos enemigos, los romanos, llogren entrar en pueblu y robar el so texu sagráu. Gavitus, el fíu el xefe, sal montáu nel so asturcón a la gueta'l texu. Nun va tardar n'atopar güelgues nel barru...

Como tando tol día nel infiernu'l demoniu nun s'enteraba de lo que pasaba na tierra, un día decidió mandar a un espía a ver qué yera lo que de verdá pasaba. Escoyó pa esa misión a un esperteyu al que-y fexo una marca en pechu en forma de cruz pa reconocelu depués. Colos informes que-y pasó esti esperteyu diabólicu, el demoniu trazó un plan malváu p'acabar cola allegría de los neños. Pero les coses diben torcése-y un poco.

Mur ta de vacaciones y ¿qué se fai en vacaciones? Trastaes. Asina que’l pá y la ma deciden unvialu al campamentu de branu. Ellí búsquen-y ocupación: cuidar la zona de xintar. Mur yá se ve vistíu de guarda, con gorra y too, tan contentu. Pero un día too se complica porque, nun coche ruidosu qu’echa fumo per tolos llaos, apaecen los Goínez, una familia de... gochos. Otru relatu de Carballeira pa los neños, escritu y ilustráu cola gracia avezada d’esti autor y dibuxante.Enrique Carballeira Melendi nació nel Infiestu, onde vive, en 1970. Sigue trabayando na radio y poco a poco va faciendo y publicando llibros que de xuro yá conocéis: «El cuélebre y l'home l'espaciu» (1991), «El principín medranosu» (1992), «El gaiteru de Sotu» (1993), «Les aventures de Xaime Bon, detective galácticu» (1995), «Un carbayu cocoteru» (1996) y «Tres hestories de Ñublina más una de propina» (1996). Dibuxa hestories nel periódicu de cómic «El Gomeru», n'«El Fielatu», fai carteles...

A toos nos dan mieu les pantasmes, pero la madrastra y la hermanastra d’Olaya trátenla mui mal en casa, conque siempre ye preferible pasar la nueche nun castiellu encantáu que tar tol día fregando platos. Olaya escápase y llega al castiellu, onde va atopar unes bisarmes mui insistentes. ¿Nun será too cuestión de tratalos con mano izquierda? Na so aventura nel mundu sobrenatural, Olaya va atopar un perrín abandonáu que de xuro que la ayuda.Enrique Carballeira Melendi nació nel Infiestu, onde vive, en 1970. Sigue trabayando na radio y poco a poco va faciendo y publicando llibros que de xuro yá conoceis: «El cuélebre y l'home l'espaciu» (1991), «El principín medranosu» (1992), «El gaiteru de Sotu» (1993), «Les aventures de Xaime Bon, detective galácticu» (1995), «Un carbayu cocoteru» (1996) y «Tres hestories de Ñublina más una de propina» (1996). Dibuxa hestories nel periódicu de cómic «El Gomeru», n'«El Fielatu», fai carteles...

A Grillu présten-y munches coses: lleer el periódicu, mirar les estrelles... Esto último ye lo que-y presta más y a veces queda tiráu nel xardín de casa la nueche entera. Grillu namás echa en falta tener collacios. ¿Podrá pidi-y a esa estrellona fugaz que-y los traiga? De xuro que se cumple’l so deséu. Anque lo que-y venga del cielu seya una estraña nave na que viaxa un bichu verde tovía más estrañu. Esti ye’l primer llibru d’un nuevu autor, el piloñés Miguel Rojo Martínez. Les ilustraciones son del so paisanu Enrique Carballeira.

Conceyu de Piloña, hai 200.000 años, más o menos. Sidronucu, sal col padre a deprender les artes cinexétiques pero tien un problema: nun-y presta nin muncho nin poco matar animales.

Pelayu tien muncha imaxinación y esti ye un talentu que lu pue sacar de munchos apuros. Por exemplu, pa xustificar el llegar tarde a clase. Un platillu volante con estraterrestres, una banda pirates y un cuélebre marín son dalgunes de les ocurrencies que-y salen del maxín. Más qu'imaxinar aventures, l'asuntu ta en viviles como si foran verdá y pa eso fai falta una cosa: contales bien.

El fenómenu de la emigración ye parte consustancial de la historia del pueblu asturianu y esi ye´l tresfondu d´esti relatu del poeta astur-mexicanu Fernando Fernández.